Eivør aldrei litið betur út

Af: Kristjana Guðbrandsdóttir

Eivør vakti mikla athygli þegar hún dvaldi á Íslandi liðna helgi og spilaði á tónleikum í Langholtskirkju. Hún hefur sjaldan litið betur út enda ástfangin og sæl í sambúð í Kaupmannahöfn.
Hún er væntanleg aftur til landsins í byrjun mars en þá heldur hún nokkra tónleika á landinu.
Eivør nýtti tíma sinn vel hér á landi, heimsótti vini og kíkti á útsölur. Þegar blaðamaður hitti hana í kaffi á kaffi Babalú hafði hún nýverið komið við á útsölu í Rokki og rósum og fest kaup á forláta hárspöng með slaufu sem hún ber á myndinni og ljósgrænni hnepptri peysu.
Eivør segir stíl sinn afslappaðan og frjálslegan og hún er mikið fyrir að blanda gömlu og notuðu við nýtt. Hún fann leðurjakkann í Osló en þar finnst henni gaman að versla. „Osló er mikil tískuborg en óhemju dýr, þannig að ég kaupi aldrei mikið þar þótt mér finnist gaman að skoða.“
Hún gengur mikið í gallabuxum og fallegum ullarflíkum og segist dást að færeyskri og íslenskri hönnun á ullarflíkum. „Bæði íslensk og færeysk hönnun eru í brjálæðislegum blóma,“ segir Eivør. „Mér finnst gaman að versla hér á landi og alltaf hægt að fá eitthvað skemmtilegt. Hún var sérstaklega ánægð með hárspöngina úr Rokki og rósum sem hún fékk á aðeins 2000 krónur. „Ég kaupi sjaldan dýrar flíkur og það er sérlega ánægjulegt að kaupa fallega fylgihluti og flíkur sem gera mikið fyrir útlitið á lítinn pening.“

Myndagallerý:




Via: DV.IS

Thanks to Sem Johnsson for letting us know!